Шардара ауданы әкімдігінің ресми сайты

Кеше аудан әкiмдiгiнiң мәжiлiс залында Қазақстан Республикасы Тәуелсiздiгiнiң 20 жылдығына арналған салтанатты жиын болып өттi. Жиынға аудан әкiмi аппаратының мүшелерi, ауыл әкiмдерi, мекеме басшылары, әлеуметтiк сала қызметкерлерi мен кәсiпкерлер қатысты. Жиын барысында аудан әкiмi М.Марайым осы жылдар аралығында аудан көлемiнде атқарылған ауқымды шараларға шолу жасады.

– Аудан экономикасы соңғы жылдары жоғары қарқынмен өсiп келедi. Мысалы, 2007 жылы аудан бюджетi бар болғаны 2 млрд. теңгенiң айналасында болса, қазiр бұл көрсеткiш 3,5 есеге ұлғайып, 8 млрд-қа жуықтады. Сол жылдардан берi ауданымыздың егiстiк көлемi 10 мың гектарға артты. Бiр кездерi санаулы ғана қалған мал басы қайта толығып отыр. Осындай жетiстiктер әлеуметтiк салада да көп. Мұның барлығы да Тәуелсiздiгiмiздiң нәтижесi деп ұғынғанымыз жөн,–дедi аудан әкiмi өз сөзiнде.

Сонымен бiрге жиын барысында ауданымыздың саяси-экономикалық, мәдени-әлеуметтiк тұрғыда дамуына сүбелi үлес қосқан бiр топ азаматтар Қазақстан Республикасы Президентiнiң 2011 жылғы 10 қарашадағы Жарлығына сәйкес “Қазақстан Республикасы тәуелсiздiгiне 20 жыл” мерекелiк медалiмен марапатталды.

ӨСКЕН-ӨҢІР ақпарат